Davao City – Anaa sa 30 ka mga membro sa simbahan ang nanga-angol human nahugmak ang simbahan sa Assembly of God alas-12:30 sa adlaw’ng Dominggo sa udto nahitabo sa Blk. 7 Riverbed Piapi, Boulevard, Brgy. 22-C siyudad sa Davao.
Gisaysay ni Jessie Orque, usa sa pastor sa maong simbahan ilawom sa Glow Ministry, kalit na lamang nahugno ang ilang simbahan nahimutang sa daplin sa baybay samtang swerte usab ang upat ka mga langyaw nga misyonaryo nga wala naapil sa pagkaangol nga mao sila Rianna Willamson (22 anyos), Iliganoa Muranyi (57 anyos), Suzie Kelly (51 anyos), ug Marie Casquette (37 anyos) kinsa pulos taga-Australia.
Sa imbestigasyon sa kapolisan migula nga ang hinungdan sa pagkahugno sa maong simbahan tungod usab a sa gidugayon nga muabot na sa walo ka tuig ug gigama lang sa light materials diin gituohan nga na wala na makaya ang kabug-aton sa mga magtoto-o nga maoy hinungdan sa pagkahugmak.
Wala pa masayri kung pila ang kantidad sa pagkadamyos sa mga gamit sa maong simbahan.
Hinuon dali kining girespondehan sa mga personahe sa Central 911 lakip ang mga volunteers nga maoy mitabang sa mga nanga-angol dayon gipangdala sa Southern Philippines Medical Center (SPMC) aron matambalan.
RadyoMaN Don Pulayao
