Davao City – Gibutyag sa Davao City Police Office (DCPO) nga nahimong ‘satisfactory’ ang rating sa gipahigayong simulation exercise (Simex) kabahin sa Inter-Agency Response to Mass Shooting and Hostage Situation kagahapong adlawa, Miyerkules (Mayo 19, 2021) sa Davao City National High School (DCNHS), syudad sa Davao.
Sa interbyu sa DXDC RMN Davao kang Police Colonel Kirby John Kraft, DCPO Director, gibutyag niini nga ang City Disaster Risk Reduction and Management Office (CDRRMO), ang mihatag og assessment o grado human sa aktibidad.
“So ang naging critique po, rating ng ating CDRRMO is satisfactory rin po ‘yung ating naging performace po doon (sa simulation exercise),” segun ni Kraft.
Matud ni Kraft, aduna pay mga kinahanglan i-improbar apan gipasalamatan niini ang kooperasyon ilabi na sa mga magtutudlo diin dako kinig tabang aron magbaton sa igong kahibalo kung unsay angay himuon panahon sa maong sitwasyon.
Gilangkuban sa DCPO, Task Force Davao (TFD), Public Safety and Security Command Center (PSSCC), Bureau of Fire Protection (BFP), Department of Interior and Local Government (DILG), ug Department of Education (DepEd), ang Simex sa security clusters sa syudad sa Davao.
RadyoMaN Kirby Manzon
