Davao City – Makonsidera nga halangdon ang gihimo ni Ormoc City Mayor Richard Gomez diha sa paghatag og usa ka sakong bugas nga ayuda sa matag pamilya kinsa naapektohan sa COVID-19 crisis karon.
Matud ni Lasang Barangay Captain Allan Simo-ag, kaya kaayong maayudahan ni Mayor Richard Gomez og tag-usa ka sakong bugas ang iyang katawhan gumikan sa kagamay sa dakbayan ug sa populasyon sa ilang lugar.
Nindot unta kon usa ka sakong bugas inay lima kon duha ka kilo ang mahatag sa matag pamilya, apan dili kaya sa LGU Davao ang pagsustiner niini gumikan sa kadako sa syudad ug sa populasyon, obserbasyon ni Simo-ag.
Bisan og pila lang ka kilo sa bugas ug mga de-lata ug noodles ang nahatag sa LGU Davao City, natagbaw ug walay reklamo ang mga residente sa barangay Lasang, sumala sa kapitan.
Segun sa opisyal, naghingapin ang tabang sa LGU Davao sa iyang katawhan kay gawas sa food rations, nag-ayuda usab og gulay ang City Agriculture’s Office, cash aid sa DSWD ug dugang 100 ka sakong bugas sa matag barangay.
Giingon ni Simo-ag nga bahala’g ginagmay ang ayuda basta dili lang mahutdan ang syudad og pundo alang sa pagtabang sa tanan hilabi na sa worst-case scenario mugna sa COVID-19 crisis dinhi sa dakbayan.
Masaligon ang kapitan nga miagi sa makuti nga balidasyon ang mga benepisaryo sa asistinsya gikan sa lokal ug nasudnong gobyerno aron dili magdoble ang makapahimulos sa tabang sa kagamhanan.
RadyoMaN Joel Viray
