Naghiwat sang simulation exercises (simex) ang Iloilo City Police Office kaina sang aga.
Ini agud matakus ang kahanda sang kapulisan sa pagbantay sang kapiyestahan sang Jaro buwas nga adlaw, Pebrero 2.
Sa nasambit nga simulation exercise, gingamit sang kapulisan ang senaryo sang shooting incident kag bomb. threat.
Ginpahayag ni ICPO Spokesperson Police Chief Inspector Sheila Mae Sangrines nga mas hugot nga seguridad ang ila ipatuman sa kapiyestahan sang Jaro kasuno sang natabu nga pagpangbomba sa Jolo, Sulu.
Suno kay Sangrines nga indi nila pagpasugtan nga gub-on sang bisan sin-o man ang selebrasyon nga ginadugukan sang linibo nga mga deboto.
Angut sini, hugot nga ipatuman sang kapulisan ang regulation ordinance nga nagadumili sa pagdala sang back pack kag dalagku nga bag sa tion sang dalagku nga mga events kasubong sang Fiesta sang Jaro.
Ang Kapiestahan ni Nuestra Señora Dela Candelaria isa sa pinakadako nga piesta sa Rehiyon bangud sang linibo nga mga deboto nga nagapadulong kada tuig.
