Davao City – Suportado sa Trade Union Congress of the Philippines (TUCP) ang lakang sa nasudnong gobyerno nga patas-an pa ang excise taxes sa mga ‘sin products’ sama sa mga ilimnon ug sa mga sigarilyo.
Gipaboran sa TUCP pinaagi ni Alan Tanjusay ang usbaw sa buluhisan sa liquor ug sigarilyo aron makibhangan ang gidaghanon sa mga Pilipino nga magpadayon sa paglunang sa bisyo sa paghubog-hubog ug pagpanigarilyo nga makaguba sa atong panglawas.
Matud ni Tanjusay, dili lamang maundang sa bisyo ug maka-daginot sa finances kun panalapi ang kadaghanan sa mga Pilipino kon dili malayo usab sila sa balatian mugna sa inom ug sigarilyo.
Gipangatarungan ni Tanjusay nga walay pulos ang dakung buhis nga makolekta sa gobyerno gikan sa industriya sa beverages ug sigarilyo kung magbaha usab ang mga masakiton gumikan sa bisyo.
Dugang ni Tanjusay, dili maipit ang katawhan ug ang ekonomiya sa nasud sa planong pagtaas sa excise taxes sa ilimnong makahubog ug sigarilyo sanglit daghan man gihapon ang muinom ug manigarilyo matag adlaw.
RadyoMaN Joel Viray
