Davao City – Posible sumala pang ang Sinaloa Drug Cartel ang nakapasulod sa mga nadiskobrehang bloke sa cocaine nga napadpad sa baybayon dinhi sa Davao region partikular na sa Purok Talisay, Barangay Santiago, Caraga, Davao Oriental bag-ohay lamang.
Sa pakighinabi sa DXDC RMN Davao kang Philippine Drug Enforcement Agency (PDEA)-XI Regional Director Antonio “Tony” Rivera, gibutyag niini nga posibleng aduna pay madiskobrehang mga iligal nga droga sa kadagatan human nga aduna pay laing 3 ka bloke sa cocaine nga nakit-an nga midugang sa 36 nga una nang nakaplagan sa mga mananagat sa lugar diin gibana-banaang anaa sa P215-M ang kinatibuk-ang kantidad niini.
“Sinaloa drug cartel is the one using cocaine. May posibilidad nga sila ang nakapasulod niana diri,” saysay niini.
Gipasabot ni Rivera nga ang modus sa maong grupo mao ang pagpadagan sa mga iligal nga droga sa destinasyon pinaagi sa paghulog sa dagat ug pag monitor niini pinaagi sa Global Positioning System (GPS).
“Ihulog nila na sa dagat, pagkahuman naay locator, meaning nay GPS. Then mo-contact na sila sa ilang mga tao diri nga maoy mupunit niana nga may locator sad o GPS. Naay posibilidad nga kini sya nasaag or kini sya wala namonitor sa mukuha diri sa atoa,” segun niini.
Una nang nagpahimangno ang opisyal nga gilayong i-report sa kapulisan o sa awtoridad ang mga makaplagang mga iligal nga droga sa kadagatan aron kini gilayong masuta ug ma-imbestigahan.
RadyoMaN Kirby Manzon
