Nakapahimulos na karon sa libreng konsumo sa tubig gikan sa Sindangan Water District ang Sindangan District Hospital sa lungsod sa Sindangan ug ang Provincial Motorpool, probinsyal nga buhatan sa Department of Agriculture nga pulos anaa nahimutang sa Barangay Misok sa maong lungsod.
Kini human mipasar ug resolusyon ang Board of Directors sa Sindangan Water District nga mi-aprobar sa hangyo ni Governor Roberto Uy sa paglugway ug libreng konsumo sa ilimnon ug limpyo nga tubig isip hulip sa gihatag sa gobernador nga financial assistance pinaagi sa water source development.
Sa maong resolusyon sa Board of Directors sa Sindangan Water District, sila ang nanghinaut nga ang maong mga buhatan mokonsumo unta sa dili molapas 50,000 litros matag bulan, sanglit base sa ilang talaan, ang Sindangan District Hospital wala man nakalapas sa 10,000 litros nga konsumo matag bulan.
Tipik usab sa maong resolusyon nga ang mga Water Districts striktong gi-monitor sa Local Water Utilities Adminstration (LWUA) sa ilang Non-Revenue Water diin kining maong libreng konsumo sa tubig maoy usa sa nakaingon niini.
Ingon man, ang maong mga buhatan butangan gihapon ug metro sa tubig gikan sa water district aron hingpit usab ma-monitor ang ilang konsumo
ug malikayan ang pag-abuso sa sa tubig aron dili malugi ang Sindangan Water District.
Nasayran nga ang Board of Directors gilangkuban nila ni Rodolfo Diamante, Wilfredo Rasonable isip maoy chairmen,Rev. Fr. Dembert Castillon-Secretary, Virgilio Llorente, Jr.-Treasurer ug Karen Panes-membro.
Ang maong resolusyon epektibo kini sulod sa lima ka tuig.
