RMN Laoag – Limlimitaran ti Sangguniang Panlalawigan ti Ilocos Norte iti panagusar ti ‘single-use plastic’ kabayatan ti pannakaisayangkat ti Regon 1 Athletic Association Meet intuno Myerkules, Marso 6, 2019.
Segun kenni Senior Board Member Matthew Marcos-Manotoc, maysa daytoyen nga ordinasa ti probinsiya, isu ti gapuna a masapul a suroten ti siasinoman nga agnanaed ken kasta pay bumisbisita iti lugar. Maysa daytoy kadagiti pinotar a linteg ti nasao a bokal.
Innayun ni Manotoc a dakkel a tulong daytoy tapno maliklikan ti panaglobo ti bilang dagiti basura ken kastapay in-inot a masursuro dagiti umili ti panagusar ti bukodda a gamit nangnangruna ti botelya ti paginuman. Ipalagipna pay a masapul nga agbalin a responsible dagiti umay-ayam iti panagdalus ti aglawlaw.
Kabayatanna, istrikto ti Philippine National Police (PNP) kadagiti umili nga agitugot ti danum nangnangruna dagiti inomen dagiti atleta tapno maliklikan ti panagsakit ti buksitda ken dagiti kemikal a posible a mangdadael kadakuada wenno iti entero nga okasyon.
Agtitinnulong met dagiti nagduduma nga ahensya ti gobyerno iti Department of Education (DepEd) tapno maprotektaran dagiti atleta kas iti Provincial Government, Department of Health (DOH), Bureau of Fire Protection (BFP), Department of Tourism (DOT) ken PNP.
Bernard Ver, RMN News
