SITG duna nay persons of interest sa pagpatay sa newly-elected kapitan sa Panabo

Davao City – Aduna nay gitutokang persons of interest ang Special Investigation Task Group (SITG) Saquian nga maoy nagpalawom sa imbestigasyon sa pagpusil-patay sa newly-elected Barangay Captain sa Datu Abdul Dadia, Panabo City, Davao del Norte nga si Engineer Paul Albert Saquian niadtong November 7, 2023.

Sa interview sa DXDC RMN Davao kang Police Major Anjanette Tirador, spokesperson sa SITG Saquian ug sa Davao del Norte Police Provincial Office (DDNPPO), iyang gibutyag nga aduna na silay nakuha nga closed-circuit television (CCTV) footages sa lugar nga makatabang sa ilang case build up.

Dugang ni Tirador nga wala pa silay ma-establisar nga motibo sa krimen apan wala nila gipaplin ang anggulo nga election-related ang insidente. Sa inisyal nga impormasyon, duha ka tawo (riding in tandem) ang nasaksihan sa mga tawo atol sa panghitabo.

“Apil sya sa anggulo (ang election-related) and all possible angles nga ginatutokan karon sa atoang (Special) Investigation Task Group. Naa ‘ta sa process of elimination hangtud nga matumbok gyud nato ang real motive sa maong pagpusil-patay,” saysay ni Tirador.

Nasayrang aron nga paspas nga masolbad ang kaso, mipasalig si Davao del Norte Congressman Alan Dujali nga muhatag og P500,000 reward money, alang niadtong makatudlo o adunay impormasyon sa mga mihimo sa krimen.

RadyoMaN Kirby Manzon