Davao City- Gipalawman sa Special Investigation Task Force (SITG) ang inbestigasyon sa pagpusil patay kang Barangay 9-A Kapitan Roderico ” Tata” Llubit.
Gipanganti ni Police Col. Kirby John Kraft, Davao City Police Office (DCPO) City Director nga gamiton nila ang tanang resources ug hugot nga tutukan ang kaso aron makab-ot ang hustisya ug masikop sa hinanaling panahon ang responsable sa pagpatay sa biktima.
Wala giwagtang ni Kraft ang posibilidad nga anaa ra sa palibot o didto sa maong lugar nagpuyo ang assailant.
“Isa ito sa pinag-aaralan natin kung bakit ganoon ang naging galaw ng suspek, usually kasi pag hitman inaano nila ang mga victim nila sa labas ng bahay hindi naman ganoon mismo na papasukin ka sa loob mismo ng sarili mong pamamahahay doon ka babarilin. Iyong possibility na baka andoon lang sa tabi-tabi o taga-roon iyong suspek hindi natin inaalis iyon,” matud ni Kraft.
Sa interbyu ni Kraft sa live in partner niini nga si Mary Grace Fuentes, anaa sa unom ka bulan na sukad nibalhin ug nipuyo sila Kap. Llubit sa Purok 10, Muslim Village, Brgy.9-A diin nahitabo ang krimen.
Gipailawom sa ballistic examination ang narekober nga upat ka mga basyo sa 5.56 caliber ammunition o mga bala sa M16 rifle nga gigamit sa suspek.
Base sa pamahayag sa live in partner ngadto sa kapulisan, adunay nagpadayong land dispute sa Purok 10, Muslim Village, San Rafael, Brgy. 9-A, Davao City, diin ang land owner gi-designate ang biktima aron i-negotiate ang mga illegal settlers aron mag self-demolish apan katunga kanila ang niuyon nga mag self-demolish nga adunay compensation samtang ang katunga usab wala nisugot ug nasuko ngadto sa biktima.
Gikanayon ni Kraft, alas 5:00 niadtong Mayo 25, 2021 nag-istoryahanay pa sila Llubit ug San Pedro PNP Chief of Police Major Jack Tilcag kabahin sa usa ka drug operation apan walay gisulti ang kapitan nga dunay hulga sa iyang kinabuhi. Gihulat pa sa SITG ang resulta sa awtopsiya sa patay’ng lawas ni Kapitan Llubit.
Mikabat na sa P350,000 ang reward money nga gihanyag ni Davao City Mayor Sara Duterte human gidungagan og P50,000, ang unang P300,000 nga gihanyag ni 1st District Cong. Paulo Duterte ug Catalunan Grande Barangay Kapitan January Duterte.
RadyoMaN Aimee Guinita
