Davao City – Gimugna karon ang Special Investigation Task Group (SITG) – Villamor tumong nga masuta ang motibo sa pagpusil-patay kang Atty. Connie Villamor sa Tagum City sa milabay’ng adlaw.
Sumala ni Davao del Norte Provincial Director Police Sr. Supt. Alan Manibog, aduna na silay lead diin nahinabi na nila ang mga emoleyado sa abogada ingon man ang bana niini apan sa pagkakaron dili pa nila mamahimong ibutyag.
“Si Villamor kasi has many activities as to her provision, may mga negosyo din siya at tinitingnan din namin ang (motibo’ng) rivalry,” segun niini.
Ginalantaw karon sa SITG-Villamor nga posibleng gikan nagbaba ang maong biktima sa iyang anak sa Manga National Highschool ug mubyahe padulong Maco kung asa nahimutang iyang negosyo apan sa iyang paglawig diha dapit sa Apokon National Highway kalit lamang kining gipusil sa riding-in-tandem sa pipila ka higayon nga miresulta sa iyang hinanaling kamatayon.
Sa pagkakaron, ginatapok ug nagapaabot na lamang sila sa resulta sa imbestigasyon sa Crime Lab ug Anti-Cyber Crime Groups ingon man ginasuta pa ang mga dalan nga giagian sa biktima diin sumala pa adunay usa ka CCTV nga posibleng makatabang atol sa ilang nagpadayong imbestigasyon.
Subay niini, gipakusgan karon sa kapulisan ang kampanya batok loose firearms ingon man ang mas pagpahugot sa seguridad gumikan sa sunod-sunod nga pagpamusil sa mga abogado sulod sa Rehiyon 11.
RadyoMaN Jason Amisola
