Sitwasyon sa nagubang mga tulay sa New Bataan, gipaabot na sa DPWH

Giabisohan karon sa Local Government Unit (LGU) sa New Bataan, Davao de Oro ang mga motorista nga muagi una sa alternatibong ruta samtang wala pa naayo ang naputol nga tulay o ang Bangoy Bridge sa Bangay San Roque, New Bataan.

Sa interview sa DXDC RMN Davao kang Lynne Dollolasa, Municipal Disaster Risk Reduction and Management (MDRRM) Officer sa LGU New Bataan, iyang gibutyag nga unang higayon nga naputol gayud ang approach sa maong dakong tulay tungod sa walay undang nga ulan nga nasinatian sa rehiyon.

“Nakankan ug na-hanging na ang approach (sa tulay). Sa iyang gibug-atan nga wala nay naga-push o naga-support sa ilalom, mao to natagak na gyud siya. Nag-install na og warning devices,” matud ni Dollolasa.

Abiso sa MDRRM Officer nga ang mga muadto og Compostela, mutuyok nalang usa agi sa Cogonon, Magsaysay, ug Katipunan ug vice versa.

Samtang, nagpabiling ‘not passable’ usab ang tulay sa Barangay Fatima, New Bataan tungod gihapon sa epekto sa baha ug landslide.

Hinuon ang maong mga damyos napaabot na sa Department of Public Works and Highways (DPWH)-XI alang sa hinanaling pag-repair sa maong mga nadamyos nga imprastraktura.

RadyoMaN Kirby Manzon