Pagadian City – Samdan ang usa ka bombero, siyam ka balay ang naugdaw ug lakip nga naabo ang usa ka kapilya sa simbahang katoliko sa nahitabong sunog sa Purok Tulingan, Brgy. Santiago ning syudad sa Pagadian alas 11:00 kaganihang buntag.
Dihang nadawat ang impormasyon daling nisirit sa lugar ang Firetruck 8 gikan sa Pagadian Central Fire Station apan gumikan sa kakusog sa kalayo nisunod ang dugang tulo ka mga firetrucks nitabong usab sa pagbugno sa kalayo ang pwersa PWAD,ZAMSURECO, kapulisan, kasundaluhan lakip na ang uban pang mga volunteers.
Sa imbestigasyon sa Bureau of Fire Protection (BFP-Pagadian) nagsugod ang kalayo sa kusina sa balay ni Raul Lucresia diin sa wala pa ang insidente si Julieta Lucresia nagluto og pagkaon aron display sa iyang tindahan apan naalarma kini dihang ang iyang anak ug apo nagpunay og singgit nga dunay dakong kalayo nga nilamoy sa ilang kusina.
Gumikan kay gama man sa light materials ang balay pas-pas nga nikuyanap ang kalayo sa silingan nga establisyemento ug panimalay.
Hingpit nga gideklarang fireout alas 12:15 na sa udto ug gibana-bana nga mokantidad sa 200,000 ang kabtangan nga naabo.
Sa pikas bahin, nihimo usab ug imbestigasyon ang Pagadian City Police Station ug nilugwa sa imbestigasyon nga niabot sa 20 ka establisyemento ang naugdaw ug ang sunog nagsugod sa Lumber yard nga gipanag-iyahan ni Maria Corazon Tidoy, empleyado sa City Engineering Office.
Niining panahona ang BFP ug PNP padayong naglusad sa makuti nga imbestigasyon aron masuta kun unsa ang sinugdanan sa kalayo ug asa kini nagsugod. (RadyoMan Kenneth Bustamante)
