Davao City – Nailhan na apan wala pa nadakpan ang mga suspek sa natigayong Kiblawan ambush.
Kini ang gikumpirma ni Kiblawan PNP Acting Police Chief Police Senior Inspector Erich Von C. Requilman sa interview sa DXDC RMN Davao diin kaniadtong adlawng Martes, gipasakahan na og frustrated murder ang mga suspek nga sakop sumala pa sa bandidong B’laan nga giilang sila YOL montebon, Manon Ante ug laing pito pa ka mga suspek.
Dugang ni Requilman, karong adlawa ipasaka ang laing kasong murder batok sa parehong mga suspek.
Sa karon, wala pa nadakpan ang mga suspek ug gituuhan karon sa kapulisan nga nagtago-tago kini sa suok nga bahin sa bukid.
Samtang ang upat ka mga samarang biktima, nakagawas na sa balay tambalanan apan duna pay tulo nga padayon pang nagpaayo sa Southern Philippines Medical Center kun SPMC dinhi sa syudad sa Davao.
Kahinumduman nga gi-ambush kaniadtong Oktubre 29, alas 12 sa kadlawun ang gisakyang dump truck sa mga Kimlawis highschool students gikan sa DAMSU festival diin duha patay samtang pito ang samaran diin ang ginalantaw nga motibo mao ang “Pangayaw” sa lugar.
RadyoMaN Renz Barbarona
