Liwat naman nga gintublag subong lamang nga gab-i sang sunog ang Siyudad sang Iloilo.
Nagluntad ang sunog antis mag-alas 7 subong nga gab-i sa ikaduha nga panalgan sang Sanson Building sa corner sang Rizal-Mapa St. City proper.
Ang nasambit nga Building gina-okupar sang pila ka mga tenants kasubong sang Salon, Medical Clinic kag Law office.
Naglawig sang isa ka oras ang pag-away sang mga bombero antis mapalong ang kalayo..
Base sa initial nga imbestigasyon sang Bureau of Fire Protection, electrical in nature ang gintunaan sang sunog.
Subong man, indi pa matumod ang kantidad sang kahalitan nga natuga sang nasambit nga sunog.
Ini na ang ikatlo nga sunog nga natabu sa siyudad sang Iloilo kon sa diin una nga insidente natabu sang Sabado sang Hapon sa Barangay Benedicto Jaro kon sa diin 72 ka balay ang nasunog kag kapin sa 4 ka milyon ang natuga nga kahalitan.
Sunod nga insidente natabu kagab-i sa barangay Dela Rama City proper kon sa diin 15 naman ka mga pamalay ang nasunog kag naglab-ot sa 200 mil pesos ang kahalitan.
Angut sini, nagapanugyan ang BFP nga maghalong gid sa sunog pinaagi sa pag-tsekyar sang mga linya sang kuryente kag likawan na ang illegal connection ilabi npa nga nagahilapit na ang Paskuwa.
