Davao City – Dili supak ang Davao Association of Catholic Schools (DACS) sa sugyot nga mandatory drug test alang sa mga sakop sa Sangguniang Kabataang Federation.
Suportado ni DACS President Jimmie Lou De Vera ang suhestiyon nga ipailawom sa mandatory drug test ang tanang mga chairman ug kagawad sa SK Federation.
Sumala ni De Vera, dili angay mahadlok ang mga opisyales sa SK sa drug test kung wala sila naggamitan sa droga o direktang nahilambigit ba kaha sa ilegal nga kalihukan.
Segun ni De Vera, angay lang mahimong sumbanan sa katawhan ug sa mga batan-on ang mga opisyales sa SK diha sa paglikay sa makadaot nga bisyo nga mao ang droga.
Busa dili usa ka dakung isyu alang sa pangulo sa asosasyon sa mga tulonghaan sa relihiyong Katoliko ang mandatory drug test sa katarongan nga sila dapat unang magpakita sa pakigbatok sa droga.
Walay luna sa gahom ug sa puwesto sa gobyerno ang mga opisyales sa SK federation nga nagpasiugda ug nag-una-una sa paggamit ug pagpayuhot sa iligal nga droga.
Dapat lang dut-an sa kaso ang usa ka SK kagawad sa Barangay 18-B ning siyudad kinsa nasikop sa mga awtoridad pinaagi sa buy-bust operation aron dili na sundon pa sa ubang mga opisyales, pagpasabot ni De Vera.
RadyoMaN Joel Viray
