Davao City – Arestado ang usa ka S.K kagawad ug lain pang duha ka lalaki atol sa gipahigayong buy bust operation sa kapulisan ganinag alas-5 sa buntag sa Iñigo Street, Brgy 18-B, Bo. Obrero, Davao City.
Base sa rekord sa kapulisan ang nadakpan mao sila si Hideki Nuchefranca Hernando, 21 anyos, S.K Kagawad sa Barangay 18-B Davao City, Majier Ferrer Bagheri alyas Masher, 23 anyos nga taga #3 Orchids Street, Buhangin, Davao City ug Arjay Caballes Cuevas, 18 anyos nga taga Ingan Garden Village, Buhangin, Davao City.
Matod pa, positibong napalitan og gituohang marijuana ang mga suspek sa mga poseur buyer sa kantidad nga 100 pesos.
Nakuha sa dinakpan ang lain pang lima ka mga sachet sa marijuana nga mokantidad og 400 pesos.
Nasayran nga si alyas Masher usa ka notadong kawatan sa ilang lugar ug ang maong mga suspek gikonsidera nga High Value Target (HVT).
Sa karon balhug na sa Sta Ana PNP ang maong mga lalaki.
RadyoMaN Abi Bibera
