Slope protection pang-alkontra sa baha gitukod sa DPWH sa Banza church ruins

63

(Jasser Gura) Sa pagsugod na niining ting-ulan nga panahon, paspas karon nga gitrabaho sa Department of Public Works and Highways ang pagtukod sa slope protection structure sa Agusan River sa Brgy. Banza, ning dakbayan sa Butuan.
Sumala pa kini aron mapanalipdan ang mga residente, ug labaw sa tanan ang Banza Church Ruins gikan sa gipaabot nga pagbaha matag higayon nga mobunok ang kusog nga ulan.
Ang Banza Church Ruins maoy usa sa mga makasaysayanong dapit sa Butuan City ug gideklarar nga tourist destination spots nga duol sa Agusan River ug kining maong simbahan gitukod sa mga Prayle nga Katsila niadtong 1625 ug giguba sa mga piratang Moro niadtong 1753. Ang salin nga kampanaryo sa simbahan, nga gilamoy sa punoan sa Banyan, nameligro nga mahurot sa pagkabanlas panahon sa padayong pagbunok sa ulan.
Matod ni DPWH XIII Regional Director Pol M. Delos Santos, ang proyekto nakakompleto na ug 390 linear meter (l.m.) sukad niadtong Oktubre 2021, gikan sa gitarget nga 540 l.m. gikan sa FY 2018-2021 nga alokasyon sa pondo.
dugang ni delos santos nga ang DPWH nagduso alang sa usa ka mas taas nga slope protection aron ang tanan nga mga huyang nga lugar hingpit nga mapanalipdan, busa, usa ka pagpadayon nga proyekto gilauman nga maaprobahan alang sa FY 2022 nga pondo.
Sa pakighinabi sa usa sa mga residente sa Brgy Banza, iyang gisaysay nga matag tuig nabalaka sila sa nagbalikbalik nga dili maayong kahimtang sa panahon nga maoy hinungdan sa grabeng pagbaha.
Kasagaran, ang mga residente napugos sa pagbakwit ug pagbiya sa ilang mga pinuy-anan ug mga kabtangan aron magkampo sa dili komportable nga mga evacuation center sa higayon nga ang tubig gikan sa Agusan River mosaka sa peligro nga lebel. Apan tungod sa gihimo karon nga proteksiyon, wala na sila karon nabalaka sa pag-uwan tungod kay natrabaho naman ang suba.
Malaumon usab ang mga opisyal sa barangay nga pinaagi sa slope protection structure, mapauswag nila ang palibot nga mga tampi sa suba ug mahimo kining mga parke ug uban pang kalingawan aron nga mas molambo ang Banza Church Ruins ug makadani kini ug daghang turista sa lugar.

Facebook Comments