Mas pinaigting ang hakbang tungo sa modernisasyon ng Dagupan matapos isagawa ang isang pulong kasama ang Department of Science and Technology (DOST) Pangasinan kaugnay ng iba’t ibang programang nakatuon sa teknolohiya at sustainability.
Isa sa mga pangunahing tinalakay ang pagtatatag ng 21st Century Learning Environment Model (CLEM) sa Dagupan City National High School. Layunin ng inisyatiba na makalikha ng mas modernong learning hub kung saan maisasama ang digital tools at makabagong pamamaraan ng pagtuturo upang mas maihanda ang mga estudyante sa makabagong panahon.
Hindi lamang edukasyon ang binigyang pansin sa pagpupulong. Kasama rin sa agenda ang paggamit ng agham at teknolohiya upang mapalakas ang aquaculture, partikular ang produksyon ng bangus—isang pangunahing industriya sa lungsod. Tinutukoy ang mga posibleng teknikal na interbensyon upang mapanatili ang kalidad ng produksyon at mapabuti ang kita ng mga lokal na mangingisda.
Tinalakay din ang mga solusyong maaaring ilapat sa waste management system ng lungsod, kabilang ang mga makabagong pamamaraan sa pangongolekta, pagpoproseso, at pagbawas ng basura upang maging mas episyente at makakalikasan ang operasyon.
Sa kabuuan, nakatuon ang mga talakayan sa paglalatag ng mga konkretong hakbang upang maisulong ang digital transformation, mapalakas ang lokal na industriya, at maisaayos ang serbisyong panlungsod sa pamamagitan ng siyensya at teknolohiya.
