iFM Laoag – Kinablaawan ni Gob. Matthew Marcos Manotoc saan laeng a dagiti napadayawan nga smart kids ita a tawen 2019 ngem uray pay dagiti nagannak kadakuada nga empleado ti gobierno probinsial.
Inbunannagna a dakkel a banag ti panagbalin a nalaing dagiti annak bayat ti panangannong a naimbag dagiti nagannak iti pagrebbenganda kas empleado ti gobierno probinsial.
Mainaig iti daytoy, impadanon ti gobernador ti panangnamnamana a dagiti napadayawan nga smart kids ket agbalin nga empleado ti gobierno probinsial wenno sumaruno a lider ti probinsia iti masangoanan.
Ginutigotna dagitoy nga agtultuloy a mangigaed iti panagbasada ken kadagiti addan iti kolehio wenno senior high school ket nasken a rugiandan a panunuten no ania ti kalikagumda a pagbalinan kalpasan ti panagbasada.
Inannugot ti gobernador nga importante ti panagadal ngem daytoy ti umuna laeng nga addang iti pananglaban iti kinakurapay.
Imbatadna a ti maikadua nga addang ket ti iseserrek iti pagtrabahoan a namnamaenna a makatulong iti probinsia.
Dakkel ti namnama ni Gob. Marcos Manotoc nga apaman a makaturpos dagiti smart kids iti panagadalda ket ad-adunton nga oportunidad a pagtrabahoan ti maidiaya ditoy probinsia ken ad-adayo ti posibilidad nga agbalin dagitoy nga Overseas Filipino Workers.
Nagapela kadagiti maseknan iti panangiyun-unada iti para ti pagimbagan ti probionsia.
Bernard Ver, RMN News
