Davao City – Angay usa nga malingkuran sa mga ginikanan ug mga magtutudlo ang pagpatuman sa palisiya pagregulate sa paggamit og smart phones kung oras sa klase.
Segun sa tigpamaba sa Department of Education Region XI Jenielito Atillo nga walay nakitang dautan niini kay para kini sa kaayuhan sa mga estudyante gani adunay mga pribadong tulunghaan ang gihatagan nila og kagawasan nga muhimo og kaugalingong lakang diha sa pagdili sa mga mobile phones sa eskwelahan.
Giklaro ni Atillo nga walay palisiya dinhi sa nasud sa pagdili sa mga cellphones sa eskwelahan ug wala usab palisiya nga nagbawal sa mga tulunghaan nga magpahiluna og susamang regulasyon.
“Kung ang teacher sa iyahang lebel gusto niya’g ingon niana kinahanglan nga magpahibalo siya sa iyang principal aron mamahimong official and then iyang i-communicate sa mga parents pinaagi sa usa ka meeting kung gusto ba sila o dili. Kay sa atong gikaingon kining cellphone is a very good gadget but sometimes this is giving us a road block para sa bata nga makatutok siya sa pagpaminaw niya sa leksyon,” sumala ni Atillo.
Gilantaw nga babag ang smartphones tungod kay giilog niini ang atensyon sa mga bata nga imbes nga mututok sa pagtuon diha na hinuon sa facebook, games ug uban pang kalingawan.
Gipunto ni Atillo nga sa pagpatuman niini dili ipadaplin ang katuyuan sa smartphone para emerhensiya.
Pwede usab nga adunay hotline nga mamahimong agianan para sa mensahe nga dapat direktang matunol sa mga tinun-an.
RadyoMaN Aimee Guinita
