Davao City – Magluwas gikan sa makalilisang nga balatian ug magsalbar sa daghang kinabuhi sa mga Pilipino ang pagpataas sa buhis sa sigarilyo nga bag-ohay pa lamang nakalusot sa ikatulo ug pinal nga pagbasa sa Kongreso.
Matud ni Dr.Ashley Lopez, Davao City Vices Regulation Unit In-Charge, makatabang ang pagpa-usbaw sa buhis sa sigarilyo aron magpugos sa mga cigarette smokers sa pag-undang na sa naandang bisyo.
Dugang ni Lopez, ang pagpanigarilyo maghatud og nagkadaiyang balatian sa tawo apan ang pinaka-common mao ang sakit sa kasingkasing, dughan, kanser ug uban pa.
Nasayran nga sa matag usa ka stick nga hithiton, pito ka minutos ang pagkunhod sa kinabuhi sa tawo ug ang usa ka pakete kun baynte ka stick kapin oras ang mawala sa atong hinulamang kinabuhi.
Ang pagpanigarilyo adunay duha ka negatibong implikasyon: Una ang pagdaut sa lawas ug ang ikaduha mao ang ekonomikanhong kahimtang sa pamilya.
Gipasabot ni Lopez nga temporaryo lamang ang ihatag nga kalipay ug relaxation diha sa pagpanigarilyo apan ang ihatud nga perdisyon sa panglawas molungtad hangtud mamatay ang tawo tungod sa kemikal nga gisagol niini.
Ang VRU naghimo nang daan og draft aron kung mahuman gilayon, ila kining isumite ngadto sa sa Konseho alang sa paghingpit sa existing ordinance kontra bisyong pagpanigarilyo.
RdayoMaN Joel Viray
