Davao City – Patay ang gituohang tingpanglabni og bag kun snatcher human matud pa misukol sa otoridad sulod sa Panabo City Old Public Market, Brgy. New Pandan, Panabo City alas 2:30 sa kadlawun kagahapong adlawa, Agosto 30, 2018.
Sa report gikan sa Police Regional Office kun PRO XI, giila ang maong suspek nga si Patrick Dibalucos Perez, 20 anyos ug residente sa km 22 prk. 15-B Budbud, Bunawan, ning syudad sa Davao.
Matud pa nga unang nagpabuto ang suspek human miresponde ang otoridad hinungdan nga midepensa ang kapulisan ug napusilan si Perez.
Dugang niini, positibong gitudlo sa mga biktima nga ang maong suspek nga maoy responsable sa pagpanglabni sa ilang bag diin sila daling nagpakitabang sa kapulisan.
Gidala pa sa balay-tambalanan ang suspek sa Somozo Hospital apan gideklara na kining dead on arrival.
Narekober sa kapulisan gikan sa suspek ang usa ka sumpak nga adunay bala sa .45 calibre diin gidala na kini sa Regional Crime Laboratory Office 11 alang sa eksaminasyon.
RadyoMaN Renz Barbarona
