TACLOBAN CITY – Ginsulong han mga gin-aaligar myembro han New People’s Army (NPA) an police station han Victoria, Northern Samar kanina han alas 3:30 han kaagahon, Marso 28.
Subay han inisyal nga impormasyon tikang ha Police Regional Office 8, maabot ha sobra 50 nga armado nga tawo an umatake ha nasabi nga police station.
Sumala kan P/Lt. Eladio Alo, hepe han Victoria PNP, 15 nga kapulisan an on-duty hadto nga mga oras ngan gindepensahan an ira police station tikang ha rooftop.
Umabot an mga gin-aaligar NPA sakay han truck ngan nagpakasul-ot hin militar nga uniporme ngan yellow strips nga bado, an iba ha ira in mga kababayin-an.
Nadakop pa han mga kapulisan an usa nga myembro han npa ngan ginkilala ini nga hi Aljun Tamuyang Cardenas, 18 anyos, residente ha Brgy. Dawo, Calbayog City, Samar.
Patay naman an 3 nga unidentified NPA members.
Umabot ha sobra tulo ka oras an purugsilay.
Narikupo gihapon tikang ha mga rebelde an usa nga M60 machine gun, usa nga M16 ngan usa nga M14 rifle.
Samaran naman ha balyuay han bala hin pusil hi P/Senior Master Sgt. Arturo Gordo, Jr. Ngan hi P/Master Sgt. Arnold Cabacang.
An truck naman nga ginsakyan han mga rebelde in nabayaan matapos nga kumalagiw an mga ini.
Sumala han Police Regional Office 8 an npa nga na-operate ha nasabi nga area in napapailarom han Section Committee 2 (SECCOM 2), Sub-Regional Committee Emporium han Eastern Visayas Regional Party Committee nga ginpapanguluhan ni Ranie Cabides alias Nadie kumo Secretary han 51 nga mga myembro.
Sumala naman kan P/Bgen. Dionardo Carlos, PRO8 Director, magin alerto ngatanan nga kapulisan ha rehiyon para magin andam ha bis ano nga pag-atake.
