Davao City – Dunay epekto sa panglawas sa tawo ang mialisngaw nga baho karon gikan sa nasunog nga NCCC mall ning syudad nga gireklamo sa katawhan nga nagpuyo dili halayo sa nahimutang sa maong gambalay.
Gipasabot ni Department of Health (DOH XI) Director ug Assistant Secretary Dr. Abdullah Dumama Jr., naggikan ang maong baho sa mga butang nga wala kaayo masunog sulod sa maong maong mall nga gitawag ug carbon monoxide.
Giingon ni Dumama, ang sobrang paghanggab sa maong baho makahatag kini og sintomas sa kalawasan sa tawo.
Tungod niini, tambag ni Dr. Dumama sa mga tawo nga anaa sa palibot nga magsul-ob og surgical mask aron dili makahanggab sa baho kay makadaut kini sa panglawas.
Gidason pa sa Director sa DOH XI ngadto sa mga tawo nga kung dunay mga namatikdang sakit tungod sa maong baho , gilayon kining magpakonsulta sa doktor, hinoon giklaro ni Dr. Dumama dunay sukod nga basehan niini nga kung dili molapas sa sukod nga 70 parts per million wala kini epekto sa panglawas sa tawo.
Sa pikas bahin, gimandoan na sa City Health Office chief Dr. Josephine Villafuerte ang Bureau of Fire Protection (BFP-Davao) nga hinloan ang maong lugar aron mawala ang maong baho nga gireklamo sa katawhan.
RadyoMaN Bernard Pantallon
