Davao City – Responsibilidad karon sa mga drayber nga mapanigurong mapatuman ang social distancing sa mga pasahero diha sa mga jeep.
Segun ni Davao City Mayor Sara Duterte kinahanglang naka-mask ug iobserba ang distansya sa mga manakayay.
“Kanang distancing gibilin nato nga responsibility sa mga drivers mao ng naa siya sa TUPAD kay kanang duha iyahang paniguraduhon nga mabuhat niya,” sumala ni mayor.
Gimando sa alkalde ngadto sa City Traffic and Transport Management Office (CTTMO) nga pamarkahan ang mga lingkuranan sa jeep aron makabalo ang mga pasahero kung asa kini mulingkod.
Samtang, sumala ni CTTMO head Dionisio Abude nga first-come, first-serve ang sistema nga ipatuman sa TUPAD Program diin anaa lang 3,000 ka nga PUJ drivers ang iakomodar.
“Limited tungod man gud sa atong budgetary requirements, kining 3,000 ka mga drivers sa matag area is expected nato ni sila nga kada adlaw nga magbiyahe,” sumala ni Abude.
Segun ni Presidential Commission for the Urban Poor (PCUP) Supervising Commissioner for Mindanao Norman Baloro nga sa mga aplikante, iandam ang mga mosunod nga requirements; 1pc 1×1 (for TUPAD ID), 1pc 2×2 ID picture (attach to profile), Certificate of Underemployment care of CTTMO, Cedula (1 photocopy), Accident Insurance Receipt (1 photocopy) sama sa Palawan or Pera Padala.
Ipresenta usab ang PUV ID ug prangkisa ngadto sa CTTMO aron matagaan kini og application form una mupailawom sa seminar.
Ang mga PUJ drivers nga maapektuhan sa ipatumang social distancing ayudahan sa lokal nga gobyerno og P11,880 o P396 per day cash for sulod sa 30 ka adlaw ilawom kini sa TUPAD program.
RadyoMaN Aimee Guinita
