Pagadian City – Estriktong gipatuman na sulod sa mga malls, groceries ,convenience stores, mga parmasya, botika ug establismento sa mga pera padala dinhi sa syudad sa Pagadian ang social distancing.
Ang social distancing mao ang pagdistansya sa labing minos usa ka metro gikan sa isigkatawo, paglikay sa mga lugar nga adunay daghang tawo ug paglikay usab sa mass gatherings o mga panagtigom. Tumong niini nga maundang o makontrolar ang pagtakod takod sa bisan unsang virus.
Kagahapong adlawa, midagsa ang mga mamalitay ngadto sa groceries ug convenience stores lakip na sa mga parmasya isip pagpangandam o pagtingob sa mga pagkaon ug tambal sa tagsa-tagsa ka panimalay. Matag usa misanong sa gipatumang social distancing.
Kahinumdumang ilalom sa Executive Order No. 14 nga gipermahan ni Mayor Sammy Co nga nagdeklara sa syudad isip State of Local Public Health Emergency, mas higpit nga pamaagi na ang ipatuman sa otoridad isip precautionary measures nga dili na makakuyap ang Coronavirus Disease (COVID-19). Gawas sa social distancing, gi-obliga usab ang publiko sa pagsuot ug face mask.
