Davao City – Daku na gayod og kalainan ang batasan sa mga batan-on nga natawo sa millennial period itandi kaniadto nga dunay dakung pagtamod ug respetar ngadto sa mga ginikanan.
Dyutay nga taghoy sa mga ginikanan magkurog-kurog ug maminaw dayon ang mga anak apan karon dili na gani mupatalinghog hasta pa gayod kasalawayon ang mga binuhatan.
Daghan sa mga batan-on karon kun wala man nalambigit sa krimen sayo misawom sa pre-marital sex nga iya lang unta dapat sa magtiayon mao nga daghan sayo nahimong inahan.
Sama sa 13 anyos nga dalagita kinsa milayas ug miipon og puyo sa lalake nga menor de edad resulta nga nagburos kini taliwala sa linghod nga pangedaron.
Sumala ni Alliance of Men of the Philippines-Davao City Chapter Convenor Rev. Carlo Claveria ang kakuwang sa oras sa mga ginikanan maoy hinungdan ngano nalambigit sa krimen ug pre-marital sex ang mga batan-on karon.
Alang ni Rev. Carlo, nakakumitir man og salaud o wala ang 13 anyos mas maayo dawaton na lang sa mga ginikanan ang ilang anak ug dili na lang panumbalingon ang iyang paglayas ug pag-ipon sa lalake.
Ang angay buhaton sa mga ginikanan mao nga hulmahon ang maayong kinabuhi sa dalagita ug dili tugtan nga ang social media maoy magtudlo ug mag-impluwensiya sa hunahuna sa 13 anyos.
Usa lang ang dalagita sa daghang mga batan-on karon nga padayon milihis sa saktong dalan kinsa padayon naglakaw sa sayop nga agianan sa krimen ug bisyo sama sa pre-marital sex.
Gibasol sa focal person ang sobra ka accessible sa social media ug nagkadaiya nga porno sites sa kahim-tang sa mga batan-on karon sama sa 13 anyos nga dalagita kinsa linghod nga pangidaron buros na.
Busa rekumendasyon ni Claveria ngadto sa mga ginikanan nga salbaron ang ilang mga anak gikan sa dili maayo nga bisyo ug monitoron ang ilang mga aktibidad ug binuhatan sa gawas.
RadyoMaN Joel Viray
