General Santos City–Posibleng mahatag na karong tuig 2020 ang libuan nga mga social pension alang sa mga benepisyaryong senior citizen. Kini ang gibutyag ni Dennis Domingo- executive assistant sa Department of Social Welfare and Development region 12.
Aminado si Domingo nga nalangan ang ilang pag-apud-apod og social pension sa mga kwalipikadong senior citizen niadtong tuig 2019, apan sa karon ilang ipaniguro nga makaabot na kini sa mga benepisyaryo.
Nasayran nga nagpahigayon na og validation ang DSWD-12 sa kanhing listahan kung asa ilang nasayran nga dunay mga pangalan nga dugay nang patay apan nagadawatan gihapon og benepisyo.
Sa karon nangatanggal na matud pa ang mga pangalan sa mga dili kwalipikadong mga senior citizen human ang gihimong validation.
Subay matud pa sa kamandoan ni Pangulong Rodrigo Duterte mao ang bag-ong listahan sa mga benepisyaryo sa social pension.
Nasayran nga dinhi sa syudad sa Gensan, mukabat sa 574 ka mga benepisyaryo ang mahatagan na og cheke.
Samtang 249 ang sa Palimbang sultan kudarat, 237 ang sa Malapatan Sarangani Province og 500 ang sa Magpet North Cotabato.
Nangayo usab og dispensa si Dominggo sa tanang mga benepisyaryo tungod sa pagkalangan sa distribusyon sa social pension.(Jordan Britos)
