Umpisa subong nga tuig himuon na nga twice a year sa baylo nga quarterly ang paghatag sang social pension sang mga senior citizens.
Ini ang ginpahayag ni DSWD 6 Regional Director Evelyn Macapobre.
Suno kay Macapobre nga ang una nga release sang social pension hiwaton sa bulan sang Abril kag ang ikaduha hiwaton naman sa bulan sang Setyembre.
Ang pagbag-o sang sistema suno kay Macapobre resulta sang kakulang sang nagakaigo nga tion para sa mga field office nga matapos ang cleansing sang ila database antis bayaran ang mga pensioners.
Ginhatagan pagtamod ni Macapobre nga importante ini agud masiguro nga ang kuwarta magakadto gid sa mga deserving nga makabaton sang social pension.
Suno pa kay Macapobre nga ang una nga tatlo ka bulan subong nga tuig igahinguyang nila sa pag-update sang listahan sang mga beneficiary.
Magluwas diri, may direktiba man halin kay Presidente Rodrigo Duterte nga indi na pag-ipaagi sa Local Government Units ang pagpanghatag sang social pension sa baylo, direkta na ini nga ipanghatag sang ahensya sa mga benepisyaryo.
Nahibaluan nga ang mga senior citizens nga benepisyaryo sang sociual pension ang nagabaton sang 500 pesos kada bulan ukon 6,000 kada tuig.
Ini nagakahulugan nga 3,000 pesos ang ila mabaton sa bulan sang Abril kag 3,000 pesos naman sa bulan sang Setyembre.
Ang Social Pension Program para sa mga indigent nga katigulangan nagatuyo nga mapaayo ang ila kondisyon pinaagi sa paghatag sa ila sang subsidy nga magamit para sa ila matag-adlaw kag medical needs.
