Davao City – Daku na og diperensiya ang pamatasan sa mga batan-on karon kun itandi sa mga hamtong kung diin sa ila nga panahon wala pay na-imbentong gadgets ug social media.
Nabantayan sa Parents Mobilization Action Group (PMAG) nga lahi na kaayo ang kinaiya sa bag-ong henerasyon kung itandi sa mga katigulangan nga na-una pang nahimong batan-on.
Kung kaniadto makamao murespeto ang kabataan sa mga hamtong, karon daku nang sukwahi tungod kay hinay-hinay nang nahanaw ang maayong pamatasan sa mga batan-on karon.
Walay laing gibasol si PMAG Davao City President Febe Matthew sa kalit nga pag-usab sa kinaiya sa mga batan-on karon kun dili ang social media lang gumikan sa sayop nga aplikasyon.
Gibati og kabalaka si Matthew sa kostumbre sa pipila diha sa ilang personal nga gamit sa social media kay gigamit usab kini sa mga sindikato aron makapangilkil ug kung dili kaha mopahigayon sa pag-‘blackmail in exchange for sexual favors’ sa target nga mga babayeng biktima.
Busa tambag ni Matthew sa mga ginikanan nga bantayan og maayo ang ilang mga anak ug giyahan sa sakto nga paggamit sa social media uban ang limistasyon aron dili mabiktima sa mga hackers.
RadyoMaN Joel Viray
