Gisaway karon sa tulo ka mga opposition lawmakers ang girekomendar nga usaka tuig nga lugway sa martial law implementation dinhi sa Mindanao.
Atol sa deliberasyon sa Joint Congressional Session, gisaway ni Sen. Francis ‘Kiko’ Pangilinan ang maong request pinaagi sa pagkwestion sa presensya sa gitawag nga ‘actual rebellion’ nga maoy gitumbok nga rasonableng kondisyon aron ipalanat pa ang balaud-militar dinhi sa habagatan.
Giusa-usa niya paghisgot ang pipila ka mga ‘terror attacks’ sa Mindanao sama sa Zamboanga Siege nga diin wala gipatuman sa liderato kaniadto ang maong extraordinary powers.
Sa iyang kabahin, gisugilon ni Albay Rep. Edcel Lagman nga dili siya kumbinsido nga ‘justified’ ilawom sa atong batakang balaud ang lugway nga usaka tuig nga giduso sa palasyo sa Malacanang basi sa rekomendasyon sa mga defense and security officials sa Duterte administration.
Matud ni Lagman, ang perspektibo sa Konstitusyon mao nga ang extension alang lamang niadtong ‘original period or duration of implementation’ ug dili ang ideya nga usaka bag-ong ‘extension of an extension.’
“Actual rebellion is not a mere state of mind or invasion or fear..it is not contrived,” depensa sa kongresista sa oposisyon.
Sa iyang kabahin, gisupak ni militant partylist Rep. Karlos Zarate ang extended martial regime sa rason nga damay sa operasyon ang mga walay labot sa kampanya.
Si Sen.Franklin Drilon nabalaka nga ang extension mao nay ‘prelude’ kun pasiunang lakang alang sa usaka nationwide martial rule mientras si Sen. Risa Hontiveros nakabalaka nga ang extreme measure mamahimo na hinoong ‘strategy for NPA recruitment.’
Una niini, pipila ka mga magbabalaud hugot hinoon nga nipaluyo sa extended martial law pinaagi sa pag-ingon nga nakahatag kini ug ‘blanket protection’ sa katawhan ug nga akseptado kini sa mabagang duot sa mga lungsuranon kinsa gibati nga sila mas luwas ilawom sa maong sistema sa pamalaud.
Gitubag usab karon ni Defense Sec. Delfin Lorenzana nga ang hulga sa atong seguridad anaa gihapon gumikan sa nagpadayong ISIS online recruitment ug ang dakung posibilidad nga ang bag-ong hut-ong human napapas ang Maute magkahiusa ug mag-‘regroup’ aron ilusad na usab ang lain pang Marawi-style terror campaign.
Nagpadayon pa karon ang mainitong diskase ug debate tali sa mga congressmen ug mga senators sa isyung martial law extension.
RadyoMan June Duterte
