Solusyon sa problema sa dalan sa Marilog, buot madungog sa SOCA ni Mayor Baste

Davao City – Nanghinaut ang usa ka lider sa mga mag-uuma sa Marilog District, Davao City nga madunggan ang ilang mulo atol sa State of the City Address (SOCA) ni Davao City Mayor Sebastian “Baste” Duterte karong adlawa, August 6, 2024.

Sa interview sa DXDC RMN Davao kang Tata Pelaris, chairman sa Marilog District Coconut Cooperative, iyahang gipasabot nga hangtud karon nagpabiling problema sa mga mag-uuma ang dili maayo nga dalan, rason nga lisod kanila ang pagpagawas sa ilang mga produkto gikan sa ilang umahan.

“Naguol gani ko nagapaminaw sa ilang report sa social media nga atong DPWH (Department of Public Works and Highways) nagsige og pangguba diha sa dalan bisan nindot pa ang dalan pero ang among dalan diri sa Marilog wala pa tagai og pagtagad. Hinaut ko nga mahisgutan ni ni Mayor Baste alang-alang sa among farm-to-market road sa entero Marilog District nga naglangkob sa 12 ka barangay,” saysay ni Pelaris.

Sa rate nga 1-10, kwarto ang mahatag nga grado ni Pelaris kung basehan ang ilahang sitwasyon nga wala pa gihapoy solusyon. Apan malaumon siya nga mahatagan kini’g kasulbaran ilawom sa pagdumala ni Mayor Baste.

RadyoMaN Kirby Manzon