Davao City – Hangtud nga wala pay bakuna kontra COVID-19 nga ma-develop sa mga medical experts sa kalibutan, dakung posibilidad gihapon nga magpabiling dakung hagit sa Duterte administration ang nasangpit nga health crisis ug pandemic.
Sa interview sa morning primetime radio social commentary program ‘Straight to the Point,’ gisugilon ni Davao journalist ug batikang columnist Serafin Ledesma nga rason sa malaumon nga scenario sa unahan mao ang report nga aduna nay bakuna nga gi-eksperimentohan karon ang mga nang-unang kanasuran sama sa China ug Russia hinonoa dili kini madali tungod kay daghan pang mga himoong laboratory tests alang sa pag-validate.
Matud ni Ledesma, hangtud nga wala pay bakuna batok sa coronavirus disease, bugtong himoon sa mga tawo aron makalingkawas mao ang pagtuman sa mga health protocols o preventive measures sama sa makanunayon ug ensaktong paggamit sa face mask, pagtuman sa social o physical distancing ug ang kanunay nga paghugas sa kamot sanglit mao ra kini ang pamaagi aron malikay sa maong balatian nga makamatay.
Sa aspetong panarbaho, nagtoo si Ledesma nga angayang dili magsalig ang tawo sa pamuno-nasud inay maningkamot sa ilang kaugalingon tungod kay inanay na mang nibalik ang mga kumpaniya sa ilang tagsa-tagsa ka mga operasyon ug sa ilang mga negosyo.
Nagtoo si Ledesma nga makabangon ra gihapon ang ekonomiya sa nasod ilawom sa Duterte administration taliwala sa krisis nga nasinatian sa nasud karon.
RadyoMaN Bernard Pantallon
