Davao City – Sa taas nga panahon, nabantug na ang mga Pilipino sa tibuok kalibutan nga lig-on ang pundasyon sa pamilya nga bisan pa og unsa ka kakusog sa bagyo sa mga pagsulay, dili gayud kini mabungkag bisan kanus-a.
Apan sa dili madugay, posibleng hinay-hinay mahuyang ang pundasyon hangtud matumpag ang gambalay sa pamilyang Pilipino gumikan sa mga sugyot-balaudnon nga nakasupak ug nakapasipala sa kabubut-on sa Diyos.
Matud ni Coalition of Concerns for Family of the Philippines (CCFP) Focal Person Pastor Jun Sorongon nga sa gihimong lakang sa mga magbabalaud sa nasud, ang tanang katawhan ang mo-ani unya sa ipakanaog nga silot sa Kahitas-an.
Gidasig ni Sorongon ang nagkadaiyang hut-ong sa mga Kristiyano nga maghiusa sa pagsupak sa mga balaudnon sama sa SOGIE Equality Bill, Same Sex Marriage, Dissolution of Marriage, ug Divorce Bill.
Nabalaka si Sorongon nga kung walay himoon ang mga Kristohanon sa pagkontra sa mga proposed legislations, basin masusama ang Pilipinas sa Sodom ug Gomorrah nga gisunog sa Diyos gumikan sa pagpakasala.
Segun ni Sorongon, ang naasoyng mga sugyot-balaudnon kabubut-on ra sa tawo ug dili iya sa Ginoo, busa walay luna sa mga tumutoo ni Kristo Hesus ang maong mga balaud.
Ug kung ipamugos gayod sa mga lawmakers ang pagpasar sa naasoy nga mga balaud ug i-implimentar kini sa gobyerno, nan mismo ang kagamhanan maoy niguba sa istruktura sa pamilyang Pilipino.
Nagtoo ang CCFP nga kung ugaling makalusot sa Kongreso ug mapirmahan ni Pres. Rodrigo Duterte ang giduso nga mga balaud, basin sa sunod ang pangayoon mao na unya ang pag-legalize sa abortion.
Mao nang sa pagkakaron pa lamang daan, angay nang alkontrahon ug dili na hatagan pa og kahigayonan ang ingon niini nga matang sa mga balaud, dugang ni Sorongon.
RadyoMaN Joel Viray
