TACLOBAN CITY – Gin-iistudyuhan yana han Sanguniang Panglungsod han Tacloban kun ipapadayon pa ba an paggamit han South Bound Terminal ha Marasbaras.
Kun mahihinumduman, temporaryo nga ginpagamit la anay an mao nga terminal para han mga pampasahero nga jeep ngan bus nga tikang ha south bound yana nga holiday season agud maibanan an pagbugiot han trapiko.
Sumala kan Tacloban Vice Mayor Sambo Yaokasin, mahitungod nga pribado an nagtatag-iya han mao nga terminal nahingangadto gihapon han ira an terminal fee han mga pampasahero nga sarakyan. Pag-iistudyuhan gihapon han Sangunian kun nakabulig ba an mao nga terminal ha pag-iban han dalagan han trapiko, ngan kun nakag kontribwer ha ekonomiya han syudad.
Dugang pa han opisyal, damo gihapon nga mga negosyante ilabi na ha downtown area an natipa ha paggamit han South Bound Terminal ilabi na nga namumutang ini sapit la han usa nga mall ha Marasbaras.
Ginsayod naman han opisyal, nga an ginbubuhat nga pag istudyo in agud makita kun ano an mas makakaupay para han kadam-an. Masasabtan naman an magigin resulta hini yana nga Enero 2019.
