Wala pa nagabaton sang ginacommit nga mga preso halin sa mga police stations dire sa probinsya ang South Cotabato Rehabilitation and Detention Center bilang kabahin sang precautionary measures batok balatian nga coronavirus disease ukon COVID-19 sang pamunuan.
Paklaro pa ni OIC Warden Felicito Gumapac ini tungod wala sang quarantine area ang Provincial Jail nga sarang butangan sang i-commit nga mga preso halin sa mga police stations tungod indi man masigurado nga wala sang dala nga COVID-19 ang mga ini kag mabudlay nga makontrol sa tion nga makasulod sa jail ang balatian.
Ginkumpirmar niya man nga ginpaisplikar siya sang korte kon ano ang rason ngaa indi magbaton sang i-commit nga mga preso.
Apang sa pihak sang paandam sang COVID-19 nagapadayon naman suno pa sa iya ang hearing sa kaso sang mga inmates.
Dugang pa ni Gumapac nga wala pa man sang kasigaraduhan kon san-o mabalik ang visiting days sa Provincial Jail nga temporaryo nga gin-untat tungod sa paandam sang COVID-19 kundi ang ginaphanugutan lang nila ang pagdul-ong sang pagkaon sang himata sang mga preso, apang ginasunod ang ginapatuman nga movement pass sang city government sang Koronadal.
