TACLOBAN CITY – Tulo kabulan antis an midterm elections, ginpirmahan ni Presidente Rodrigo Duterte an bag-o nga balaud nga nagtutunga ha distrito ha probinsya han Southern Leyte.
Ginpirmahan han presidente an Republic Act 11198 dida han Pebrero 1.
Ha ilarom han balaud, an syahan nga distrito han probinsya amu an Maasin City ngan mga bungto han Macrohon, Padre Burgos, Limasawa, Malitbog, Tomas Oppus ngan Bontoc.
An mga bungto naman han Sogod, Libagon, Liloan, San Francisco, Pintuyan, San Ricardo, Saint Bernard, Anahawan, San Juan, Hinundayan, Hinunangan ngan Silago, amu an ikaduha nga distrito.
An incumbent nga congressman han Southern Leyte’lone district in padayon nga maserbe ha bug-os nga probinsya tubtob han election han ikaduha nga distrito.
An Southern Leyte in mayada sobra 260,000 nga botante, ini in sumala han Commission On Elections (COMELEC).
