Davao City – Nagpasalamat si Southern Philippines Medical Center (SPMC) Chief Dr. Leopoldo Vega kang Mayor Inday Sara Duterte-Carpio tungod sa pagdonar sa kapin dos milyones ka pesos nga suweldo sa tibuok tuig nga gihimo karon nga trust fund alang sa mga frontliners sa corona virus disease 2019.
Sumala ni Dr. Vega, dakong tabang ang kapin duha ka milyon nga pesos alang sa mga benepisyo ug ayuda sa mga frontliners nga magkasakit sa COVID-19 gumikan sa ilang pag-atiman sa mga pasyente nga nataptan sa nasangpit nga balatian diin sukad pa kaniadto walay puas ang pagtabang sa Presidential Daughter sa SPMC.
Nahibaloan, nasakitan ang Mayor dihang iyang nasayran nga dunay 12 ka medical workers sa SPMC ang nasakit human nasakdan sa ilang mga pasyente nga positibo sa virus kansang maoy nagtukmod kaniya aron idonar ang tanang suweldo karong tuiga.
Sa karon, tulo na ka medical workers ang naayo ug nakagawas sa ospital ug siyam na lamang ang padayon pang nagpaalim sa tambalanan gikan sa makamatay nga sakit nga mikuyanap karon sa tibuok kalibutan.
RadyoMaN Joel Viray
