Davao City – Wala nag lakaw-lakaw kun naglatagaw sa kadalanan ang usa ka Person Under Investigation (PUI) sa dakbayan sa Davao human kini nakitaan og simptomas sa COVID-19.
Kini maoy gipaniguro ni Dr. Leopoldo Vega, Chief of Hospital sa Southern Philippines Medical Center (SPMC) kinsa nagkanayon nga nagpabilin sa Isolation Area ang maong PUI.
Ang klaripikasyon giluwatan human nanggula ang mga post sa social media nga matud pa adunay usa ka foreigner nagalaag gihapon sa dakbayan bisan kun positibo kini sa maong balatian.
Sumala ni Vega, aduna gihapoy ubo ug kalintura kun mga simptomas sa COVID-19 ang maong PUI diin wala giingon kung asa kini naggikan una pa man nahidangat dinhi sa Davao.
Nasayran nga March 2, 2020 niabot ang maong PUI ug niadtong March 5, nakitaan na kini og simptomas diin mao usab kining adlawa nga nangayo kini og medical assistance.
Karong adlawa, gilaumang ipagula na ang resulta sa confirmatory test sa maong PUI.
Segun ni Vega, kung mag-positibo kini, gilayong ipatuman nila ang ‘contact tracing’ sa mga nakauban niini aron masubay kung nagbaton ba kini sa maong mga simptomas gani ipailawom usab sila sa mandatory quarantine.
Samtang gipaniguro ni Vega nga andam ang SPMC ingon man ang mga pasilidad niini pananglitan kon adunay magpositibo sa COVID-19 dinhi sa Davao Region sama na lamang sa PCR Machine nga maoy makinang gamiton sa pag-detect sa managlahing virus sa kalawasan sa usa ka tawo.
Subay niini, gi-awhag ni DOH-XI Regional Director Dr. Anabelle Yumang ang publiko nga dili magpataka og share og sayop kun inaccurate nga impormasyon diha sa social media aron kalikayan nga bation ug tumang kalisang kun panic ang mga residente.
Sa pikas bahin, mag-augment ang DOH-XI og 14 ka mga nurses kinsa maoy mo-abag sa Bureau of Quarantine nga mutabang og suta sa mga adunay COVID-19 symptoms.
Pipila sa mga simptomas una pa man makonsidera nga PUI o PUM (Person Under Monitoring) mao kung adunay ubo, kalentura, paglisod sa pagginhawa, travel history sa mga adunay travel restrictions nga lugar sama sa Hongkong, China ug uban pa ingon man kon adunay exposure sa mga tawong nag-positibo sa COVID-19.
RadyoMaN Jason Amisola
