BREAKING NEWS – Gintiro patay ang Deputy Commander sang Police Station 6 pasado las 7 sini gid lamang nga aga sa atubang sang isa ka eskwelahan sa Brgy. Singcang Airport, ciudad sang Bacolod.
Nakilala ang biktima nga si SPO4 Oscar Exaltado, 45 anyos, residente sang Purok 3, Brgy. Singcang Airport, Bacolod City kag amo ang Deputy Station Commander sang Police Station 6.
Suno sa mga naka-kita ang biktima sakay sang iya motorsiklo kon diin sang ini ang nag-pundo, gintupungan ini sang 2 ka suspek nga nakasakay man sa motorsiklo kag gilayon nga gintiro.
Nag-angkon sang 5 tanan ka igo sang bala ang biktima matapos ini una gintiro sa iya paa kag ginsundan sa iya ulo nga amo naman ang gintunaan sang iya kamatayon.
Ginpahayag nga wala labot sang duha ka suspek nga nagasakay sa motor, may isa pa gid ka lalaki nga sakay man sa motorsiklo nga nagahulat kag ginapatihan amo ini ang look out.
Pahayag sang witness nga sang natumba na si Exaltado, nagpalapit pa ang lookout, ginkuha ang armas sang biktima kag amo pa ang gin-gamit sa pagtiro sa amo nga pulis.
Na-recover sa scene of the crime ang kapin 17 tanan ka empty shell sang armas nga padayon pa karon ginahibalo kon ano nga kalibre, samtang, gilayon naman nga nagpalagyo ang mga suspek./dyHB BACOLOD
