Davao City – Dili posible nga mag-guest candidate si Davao City Mayor Sara Duterte-Carpio sa PDP Laban ugaling tanyagan siya sa grupo alang sa piniliay sunod tuig, 2022.
Sa interbyu sa DXDC RMN Davao kang Mayor Christine Frasco sa Liloan, Cebu City, Spokesperson ni Mayor Sara, gisaysay niini nga una nang giluwatan ni Sara nga dili kini mudagan sa national position human sa kasabutan nila sa amahan niining si Presidente Rodrigo Duterte nga usa lamang ka Duterte ang mudagan sa 2022 National Elections.
“Nisulti na man si Mayor Sara na dili siya mudagan sa national post. So, I think it necessarily follows nga dili siya mag-guest candidate of any party including PDP (Laban),” saysay ni Frasco.
Nasayud si Frasco nga aduna pay panahon sama sa gilauman sa uban nga posibleng mausab pa ang desisyon sa alkalde apan sa pagkakaron, kinahanglan nga respetuhon na lamang ang baroganan sa presidential daughter.
“We have to respect the position of Mayor Sara and I’m very hopeful and I’m sure ang uban pud nga kung dili man gani karong umaabot nga 2022 (Elections), hinaut pa unta, one of these days, puhon, that she will have the opportunity to lead our country for a better Philippines for all of us,” segun ni Frasco.
Una nang gibutyag sa tigpamaba ni Duterte-Carpio nga aduna pay katapusang termino isip mayor nga pwedeng dagahan niini sa eleksyon sa syudad sa Davao.
RadyoMaN Kirby Manzon
