Davao City – Mudagan matud pa og duha ka bulan ang proseso sa pag apply og pension sa Social Security System kun SSS alang sa mga SSS members.
Kini ang gibutyag ni Greta Quayle sa SSS Davao atol sa pakighinabi kaniya ni RadyoMaN Misel Miral-Galve sa tulumanong Serbisyong Straight to the Point diin ang duha ka bulan mao na nay posibleng pinakadugay og walay laing rekisitos nga ginapangayo ang SSS tungod adunay mga panahon ug sitwasyon nga kinahanglan pa mubalik ang mu-apply og pension sa SSS tungod sa problema sa mga papeles.
Apan sumala ni Quayle nga mahibalo man usab dayon ang nag-apply tungod padal-an nila kini og sulat.
Subay kini sa pangutana sa usa ka DXDC texter nga mag 60 anyos na og unsa ka dugay makuha o maproseso usab ang pension.
Sa pikas bahin, gipahinumduman karon ang mga pensioners nga apektado sa mga bangko nga dili na accredited sa SSS nga kinahanglan muadto sa ilang opisina aron mangayo og letter of introduction ug aron makaabri og account sa laing bangko.
Matud ni Quayle nga dunay ubang mga pensioners nga anaa gihapon sa One Network Bank apan sumala pa dili na kini authorized sa depository bank sa SSS pension.
Busa kinahanglan na mag abri og account sa laing mga bangko nga accredited sa SSS aron makuha ang pension.
RadyoMaN Renz Barbarona
