Davao City – Anaa na sa state of decomposition ang usa ka lalaking napalgang-patay sa Sitio Lakbang, Brgy. Sto. Niño, Sta. Maria, Davao Occidental kagahapon sa buntag (January 25, 2021) busa gilubong na kini sa otoridad.
Sa pakighinabi sa DXDC RMN Davao kang Sta. Maria PNP Station Commander Police Major Kirby Tan Badilles, posibleng 3 na ka adlaw namatay ang lalaki nga hangtod karon wala pa mailhi.
“So far wala pay identity sa patayng lawas… Possible more than 3 days na namatay. Ang cadaver anaa na sa state of decomposition,” segun ni Badilles.
Sa ilang imbestigasyon, posibleng biktima sa salvaging ang lalaki kinsa nakitaan og samad-pinusilan gani gigaid og pisi ang mga kamot ug tiil, gitabunan og packaging tape ang nawong ug gibutngan pa og pabug-at nga semento ang lawas aron siguro nga mulubong sa dagat apan nilutaw gihapon kini.
Sumala ni Badilles nga ang maong lalaki anaa sa 5’4 ang gitas-on, wala pa kaabot og 50 ang edad, dunay tribal tattoo sa walang abaga ug dunay tattoo sa dughan apan di na mabasa.
Matud pa walay reported missing sa ilang area apan alang sa mga kabanay nga nawad-an og miyembro sa pamilya, mamahimong makigkoordinar sa Sta. Ana PNP aron masugdan ang imbestigasyon sa maong insidente.
RadyoMaN Renz Barbarona
