Stab wounds, rason sa kamatayon sa lalaking gisulod og sako

Davao City – Gipalawman pa sa kapulisan ang imbestigasyon kalabot sa pagpatay sa usa ka lalaki ug nakit-ang gisulod sa sako kilid sa karsada sa Barangay Sinayawan, Hagonoy, Davao Del Sur niadtong Agosto 16, 2023.

Sa interview sa DXDC RMN Davao kang Police Major Rhuel Barachina, Chief of Police sa Hagonoy Municipal Police Station, iyang gisaysay nga subay sa testimonya sa kabanay sa biktima, wala silay nahibaloan nga nagbaton og hulga sa kinabuhi ang biktimang si Romeo Amacio alyas Dagul, 35 anyos.

Saysay sa kabanay sa biktima nga nga igo lamang kining nananghid nga mulakaw niadtong Agosto 14 ug wala na kini makauli.

“Monday evening, nananghid ra sa iyang iyaan (ang biktima) nga muadto sa hantakan somewhere sa Aplaya, Digos City. Mao na ‘to last siya nakit-an then a day after, didto na nakit-an nga naa na didto sulod sa sako,” saysay sa pulis.

Subay sa resulta gikan sa Municipal Health Office (MHO) samad dinunggaban ang gikamatyan sa biktima. Padayon usab nga ginasuta sa kapulisan ang motibo sa krimen ug pag-ila sa mga suspetsado.

RadyoMaN Kirby Manzon