CAPIZ – Ginpaidalum na sa state of calamity ang banwa sang Pontevedra, Capiz matapos gin-igo sang malapnagon nga pagbaha tuga sang wala untat nga pag-ulan sang nagpanalasa ang Bagyong Agaton sa probinsya sang Capiz.
Sa ginpatigayon nga special session sang mga katapo sang Sangguiang Bayan sang Pontevedra subong nga hapon, natigayon nga naaprubahan ang ordinansa nga nagadeklarar nga yara na sa state of calamity ang banwa sang Pontevedra.
Ginpahayag ni Mayor Esteban Evan Contreras nga nakasugtan nila nga ipaidalum na sa state of calamity ang ila nga banwa agud magamit ang calamity fund para mabuligan ang mga residente nga apektado sang baha.
Samtang magahatag man sang semilya sang bangrus ang LGU sang Pontevedra bilang bulig sa mga nagapanag-iya sang punong nga naapktuhan man sang kalamidad. Ginabulubanta nga nagalab-ot sa 500 hectares sang punong ang ginbaha sa nasambit nga banwa.
Sa madumduman nga kahapon una nga ginpaidalom sa state of calamity ang banwa sang Panit-an bangud man sa nangin kahalitan nga tuga sang pagbaha. Base sa record sang PDRRMO, naglab-ot sa 12 ka mga banwa sa probinsya ang lubos nga naapektuhan sang pagbaha nga dala sang Bagyong Agaton.
*Photo Credits: Capiz Aksyon News Center, Aksyon Tabang*
