Ginpaidalum na sa State of Calamity ang probinsya sang Iloilo matapos gin-igo sang bagyo Ursula sang nakaligad nga Paskuwa, Disyembre 25.
Gin-aprobahan sang Sangguniang Panlalawigan ang resousyon nga nagadeklarar sang Iloilo sa idalum sang State of Calamity matapos ang malawig nga deliberasyon sa session kahapon sang hapon.
Antis maaprobahan, gin-gisa sang mga Board members si PDRRMO director Jerry Bionat bangud madamo sang kulang sa report sini angut sa pagpanalasa sang bagyo Ursula.
Gintawag ni Board member Valentin Serag si Bionat nga incompetent nga lider sang PDRRMO.
Gintumod ni Serag ang report ni Bionat sa bagyo Ursula nga wala sang kinalain sa ginhimo man sini nga report angut sa paghalit sang El Ninio Phenomenon sa probinsya sang Iloilo.
Ginwaswasan si Bionat sang halos tanan nga Board members antis gin-aktuhan kag gin-aprobahan ang deklarasyon sang State of Calamity.
