Davao City – Padayon nga gipanawagan sa City Government of Davao ngadto sa katawhan ang ‘stay home’ campaign panahon sa long Holy Week holiday.
Gi-discourage ni Davao City Mayor Sara Duterte-Carpio ang publiko nga magbaton og mass gathering panahon sa Semana Santa, hinungdan nga nagpagula kini og Executive Order (EO) sa pagsirado sa beach resorts dinhi sa syudad sa Davao gikan Abril 1-4, 2021.
Aduna may mga planong mangadto sa beach resorts gawas sa dakbayan apan pahimangno sa Mayor nga mas maayong dili mudungan sa dagsa sa tao nga maoy hinungdan sa risgo sa Coronavirus Disease 2019 (COVID-19).
“Mas maayo pa nga karong Holy Week magpondo lang sa ‘ta sa atoang balay. Dili ‘ta mangadto aning mga resorts or beach resorts nga gawas sa Davao City when this is the time also nga muadto ang mga ubang tao. So daghan kaayo ang mga tao didto,” segun sa Alkalde.
Gikanayon ni Mayor Sara nga kung naa may aktibidad gawas sa balay atol sa Holy Week, kinahanglang sundon limitasyon sa tao sa usa ka venue o mas maayong likayan nalang ang panagtapok o ang paggawa sa balay atol sa maong panahon.
“Gina-discourage nato ang pagtapok sa mga tao diha sa mga public places during the long Holy Week holiday. Kung duna moy social events or activities make sure nga limited siya to the same household members. Kung duna moy social events nga naka-schedule sa gawas, limit it up to 25 individuals,” sulti sa Mayor.
RadyoMaN Kirby Manzon
