Stepfather nga suspek sa pagpatay og 2 ka bata, giingong wala giuli sa partner

Davao City – Gibutyag sa Caraga Municipal Police Station (MPS) nga nagbaton og problema ang usa ka stepfather nga giingong maoy rason sa iyang pagdunggab sa tulo ka menor de edad nga anak sa iyahang partner sa Barangay San Jose, Caraga, Davao Oriental niadtong June 7, 2023, diin duha sa mga bata ang namatay samtang usa ang kritikal.

Sa interbyu sa DXDC RMN Davao kang Police Staff Sergeant Esmeraldo Bayon, personahe sa Caraga MPS, iyang gisulti nga walay rekord sa barangay ang suspek nga si Mario Indawa, 43 anyos, diin normal lang kini nga mag-uuma.

Sa inisyal nga imbestigasyon, nagbaton matud pa og away ang suspek ug ang iyang partner rason nga kini milakaw, apan matud sa babayi nga nangita lamang siya og trabaho sa Mati City.

Posible matud pa nga ‘frustrated’ na ang suspek ug gihimo niya ang krimen aron mouli ang iyahang partner.

“Nagpa-blotter sya sa barangay nga ang iyahang asawa, 4 days na wala na nibalik sa ilahang balay. Ang unod sa iyahang blotter didto nga gipangita niya ang iyahang asawa, 4 days na wala niuli sa balay, basin mamatay ang mga bata sa gutom,” saysay sa pulis.

Nasayrang naka-hospital arrest karon ang suspek human gidunggab usab niini iyang kaugalingon ug gilaslas ang iyang tutunlan.

Nagpadayon gihapon ang imbestigasyon sa kapulisan samtang gitakdang mag-atubang og 2 counts of murder ug frustrated murder in relation sa Republic Act 7610 ang suspetsado.

RadyoMaN Kirby Manzon