Davao City – Nagtinabangay ang Davao LGU ug Overseas Workers Welfare Administration (OWWA) sa pag-repartriate sa mga taga-Region XI nga mga Locally Stranded Individuals (LSIs) nga natanggong karon sa ubang mga lugar sa Pilipinas pinaagi sa mga ‘mercy lights’ ug ‘Balik-Probinsiya’ Program.
Sumala ni Davao City Tourism Operations Office (CTOO) Chief Generose Tecson, hilway ang nahimong dagan sa maong programa diin daghan sa mga Davaoeños kinsa stranded karon kapin duha ka bulan na nakabalik na sa ilang tagsa-tagsa ka mga hometown kun residensya.
Hinoon, giklaro ni Tecson nga adunay mga LSIs nga bisan og dili pa nila schedule sa paglupad, nipugos og adto sa mga airport, gani mao kini ang nag-unang hinungdan sa nasinati karon nga problema sa mga stranded.
Dugang ni Tecson nga daghan ang nag-apas og trabaho sa mga probinsiya hinungdan nga migukod sa ‘sweepers flights’ apan kanselado diay ang ilang biyahe tungod sa wala hisayri nga rason.
Aminado ang maong opisyal nga wala siya’y igong kasayuran diha sa palisiya ug rason sa ubang probinsiya nganong gisirado gihapon nila ang ilang pultahan kun borders diha sa pagdawat sa ilang kaugalingong mga residente nga gusto nang mupauli sa ilang tagsa-tagsa ka gikamingawan na nga panimalay.
Giingon usab ni Tecson nga walay palta ang ilang koordinasyon sa ubang mga probinsiya apan dakung suliran mao nga walay listahan nga nahatag ngadto kanila maong nalangay usab ang pag-atiman sa mga LSIs.
Wala na mipadayag og komento ang City Tourism Officer kalabot sa mapait nga kahimtang sa mga tawo nga anaa karon sa mga quarantine facilities sama niadtong nahimutang karon sa Barangay Lacaron, Malita, Davao Occidental.
RadyoMaN Joel Viray
